Vísindaferð með Torfhildi
9.3.2010
Heil og sæl!
Öðlingarnir í Torfhildi hafa gerst svo góðir að bjóða okkur með sér í vísindaferð í Ölgerðina. Mæting er á slaginu 17:00 (húsið lokar skömmu seinna) á Grjótháls 7-11. Plássin eru u.þ.b. 40-50 í heildina og var Mímrum einnig boðið, svo við hvetjum ykkur til að vera snögg til og skrá ykkur!
Öll skráning fer fram í gegnum Torfhildi á http://www.torfhildur.blog.is/blog/torfhildur/
Pís,
Ritvélin
Umræða varðandi næstu útgáfu
22.2.2010
Jó,
Næstkomandi fimmtudag, þann 25. febrúar, mun Ritvélin standa fyrir opnum umræðufundi varðandi næstu útgáfu. Við viljum heyra hvaða hugmyndir þið hafið fyrir næstu bók og sömuleiðis láta ykkur vita hvernig staðan er hjá okkur. Fundurinn verður frá 15:00-16:25 í stofu 423, Árnagarði.
Um leið auglýsum við eftir sjálfboðaliðum í ritnefnd. Það er enn óákveðið hvort gefnar verða út tvær bækur (ljóðabók og smásagnasafn) eða ein (þetta verður m.a. umræða fundarins), svo fjöldi og tilhögun ritnefnda er enn óvís. Sendið allar umsóknir á ritvelin@gmail.com.
Einnig höfum við opnað aftur fyrir skráningar í nemendafélagið, þar sem einungis félagar geta verið með í útgáfunni. Félagsgjöld eru 1500 krónur og á að leggja inn á eftirfarandi reikning:
Reikningsnúmer: 0338-26-460209
Kennitala: 460209-1020
Munið að senda kvittun á ritvelin@gmail.com ásamt því að senda póst frá/með því netfangi sem þið viljið að fari á póstlista okkar og nafni, svo við höfum nú pottþétt alla á félagalistanum.
Við vonumst til að sjá ykkur sem flest!
Vísindaferð í Forlagið á föstudag!
15.2.2010
Nú er komið að fyrstu vísindaferðinni á nýju ári, og er förinni heitið í Forlagið.
Að þessu sinni verður þetta sameiginleg heimsókn með Mími, félagi íslenskunema, og er partýið því haldið á Fiskislóð 39 – þar sem lager- og bókamarkaður Forlagsins er til húsa. Þar er hægt að teygja vel úr sér.
Staðsetning: Fiskislóð 39, (í nágrenni við Bónus og Löður – kort má finna hér: http://skrar.forlagid.is/bokamarkadur/)
Mæting: kl. 17.30 – föstudaginn 19. febrúar
Dagskráin er frekar fjölbreytt, veitingarnar ekki af verri endanum og allir eru hvattir til þess að spyrja sem mest.
Hvort félag má mæta með 20 gesti, og er hérmeð opnað fyrir skráningar í kommentakerfi.
Hvort félag verður einnig að tilnefna þrjá félagsmenn úr sínum röðum sem verja munu heiður síns félags í svínslegri spurningakeppni, og þeir sem hafa áhuga á að berjast fyrir Ritvélina eru jafnframt beðnir um að lýsa yfir áhuga við skráningu.
Fyrstir koma, fyrstir fá þannig að einn, tveir og skrá sig!
-Ritvélin.
Leirburðarkeppni!
9.2.2010
Kæru ritlistarnemar,
Nú á fimmtudaginn ætla Torfhildur og Ritvélin að standa fyrir sameiginlegu leirburðarkvöldi, á Næsta bar kl. 20:00.
Dómari að þessu sinni er Jason Rotstein, ljóðskáld með meiru, og af þeim sökum verður keppnin á ensku.
Vonumst til að sjá sem flest, og stefnan er að redda tilboðum á barnum.
-Stjórnin
Vélritið
8.2.2010
Sæl öll!
Vélritið fær nýtt útlit! Um er að ræða eina A4 síðu, brotna til helminga. Planið er að blaðið verði minna um sig en komi jafnframt oftar út. „Þemað“ í fyrsta blaðinu verður mx 37 orða ör-skrif af einhverju tagi, hvað sem úr huganum flæðir, handskrifað eður ei. Einnig viljum við birta myndir sem mættu þá vera meðalmanns vísifingur á breidd og hæð.
Póstfangið er það sama: velritid@gmail.com
Vonum að innhólfið fari að fyllast af örskrifum sem fyrst!
Bestu kveðjur
Ritstjórn Vélritsins
Sverrir, Tumi og Hlín
Tvífarar II
7.2.2010
Rúnar Helgi Vignisson og Richard Gere.
Eftir á að hyggja hef ég aldrei séð þá tvo á sama stað á sama tíma. Tilviljun?
Ritvélin lifir!
4.2.2010
Allar fregnir af andláti Ritvélarinnar eru stórlega ýktar.
En hitt er annað mál að janúar fór illa í stjórnarmeðlimi. Tveir fengu þvagfærasýkingu, einn fór í meðferð og annar fékk tilboð sem hann gat ekki hafnað.
En hækkandi sól hefur hleypt nýjum krafti í stjórn og hefur hún ýmislegt spennandi á prjónunum. Þar ber helst að nefna vísindaferðir, árshátíð, samkeppnir með glæsilegum verðlaunum, og síðast en ekki síst útgáfa á splunkunýrri bók ritlistarnema.
En meira um það síðar.
-Stjórnin
Hvernig verður bók til? Auður Ava Ólafsdóttir
20.1.2010
Við hvetjum ykkur öll til að mæta á þennan fyrirlestur þar sem ritlistarnemar geta sérstaklega notið góðs af þeim. Þátttaka ritlistarnema hefur verið döpur undanfarið og við viljum sjá fleiri kunnugleg andlit þarna! Mætið og njótið vel – maður veit aldrei hvaða hugmyndir eða upplýsingar sem nýtast manni gætu komið fram.
Hádegisfyrirlestur 21. janúar kl. 12 í stofu 105 á Háskólatorgi
Auður Ava Ólafsdóttir ræðir um Afleggjarann
Auður Ava Ólafsdóttir kvaddi sér fyrst hljóðs með skáldsögunni Upphækkuð jörð árið 1998. Síðan kom skáldsaganRigning í nóvember sem hlaut Bókmenntaverðlaun Tómasar Guðmundssonar og nú síðast Afleggjarinn sem hreppti Menningarverðlaun DV, Fjöruverðlaunin og var tilnefnd til bókmenntaverðlauna Norðurlandaráðs.
Í fyrirlestri sínum mun Auður Ava ræða um tilurð Afleggjarans. Bókin fjallar um föður sem tekst á hendur ævintýralega ferð til að rækta rósir í fjarlægum klausturgarði.
Fyrirlestur Auðar er hluti af röð hádegisfyrirlestra sem ritlist og Bókmennta- og listfræðastofnun Háskóla Íslands efna til í vetur undir yfirskriftinni „Hvernig verður bók til?“ Þar veita íslenskir rithöfundar innsýn í tilurð þekktra ritverka, lýsa vinnulagi sínu frá hugmynd að fullfrágenginni bók og ræða um viðhorf sín til skáldskaparins. Áður hafa þau Jón Kalman Stefánsson, Þórunn Erlu- Valdimarsdóttir og Einar Kárason flutt fyrirlestra í röðinni og hafa þeir verið fjölsóttir og vakið mikla athygli.
Fyrsta bjórkvöld Ritvélarinnar 2010
20.1.2010
Fátt er ritlistarnemum jafn hollt og (ó)hófleg neysla áfengis og annarra vímugjafa. Fyrsta bjórkvöldið verður haldið á Næsta Bar á morgun, fimmtudaginn 21. janúar, kl. 20:00. Ef allt fer á besta veg endum við dauðadrukkin niðri í kirkjugarð að skrifa ódauðlegan skáldskap. Mætið!
Endurómun
10.1.2010
Endurómun færir okkur innsýn inn í nýjustu kenningar um mannsheilann.
Útskýrð verða grunnferli skynjunar, minninga og drauma. Leiksviðið er
notað til þess að prófa þessar kenningar á sviðinu sjálfu og í huga
áhorfandans.
Við notum minimalískar aðferðir til þess að tækla viðfangsefnið þar sem
ljós, hljóð og hreyfingar verða settar í jöfnur sem koma til með að hægja
á tímanum og beygja skynjun áhorfandans til að sýna fram á að heilinn er
ekki eins nákvæmt tæki og við höldum.
Sýningin er í Borgarleikhúsinu 13. og 14. janúar, næsta miðvikudag og fimmtudag.
Viðvörun: Flogaveiku fólki er ráðlagt frá því að sjá sýninguna vegna
notkunar blikkljósa (strope ljósa) í sýningunni sem þekkt er að geti
framkallað flog eða aðra vanlíðan hjá flogaveikum.
Meiri upplýsingar og myndbönd:
Facebook: Endurómun
og
Borgarleikhus.is
